Xuegos Olímpicos na Antigüedá | ||||
---|---|---|---|---|
Xeneral | ||||
Tipu de competición | actividá deportiva periódica | |||
Historia | ||||
Fundación | 776 de edC | |||
Desapaición | sieglu de V | |||
Competición | ||||
Periodicidá | Cada 4 años | |||
| ||||
Na Antigüedá, los Xuegos Olímpicos (griegu antiguu: Ὀλυμπιακοὶ Ἀγώνες, romanización: olympiakoi agōnes) foron una serie de competiciones atlétiques apostaes por representantes de diverses ciudaes-estáu griegues, nel añu 776 e.C.
Los Xuegos facíense de normal cada cuatro años o una olimpiada. Mientres la celebración de la competición promulgábase la ékécheiria o tregua olímpica, pa dexar a los atletes viaxar en condiciones de seguridá dende les sos polis hasta Olimpia. Los antiguos Xuegos Olímpicos abondo distintos de los modernos; había menos eventos y namái los homes llibres que falaben griegu podíen competir, amás de que se celebraben siempres nel mesmu llugar.
Por fontes antigües, tuvieron ente los participantes más célebres Alexandru Magnu, que participó siendo adolescente, sieglu IV e. C.
Los últimos Xuegos Olímpicos de l'Antigüedá celebráronse nel 393 d. C., casi doce sieglos dempués de los sos empiezos. Tres l'adopción del cristianismu como relixón oficial del Imperiu romanu col Edictu de Tesalónica (28 de febreru de 380), l'emperador Teodosiu prohibió toa celebración pagana, incluyendo los xuegos olímpicos.
Cuando los neños varones griegos llibres cumplíen doce años ingresaben na palestra, onde se-yos enseñaba a desenvolver los músculos y a disciplinar los nervios. A los dieciséis años entraben al ximnasiu, onde los griegos realizaben exercicios físicos y atletismu. Los ximnasios cuntaben con una pista y llugares d'exerciciu al campu ente los montes. A los venti años los griegos concluyíen la so formación deportiva onde se-yos apurríen les armes y taben capacitaos pa participar nos Xuegos Olímpicos.
Según un rellatu del xeógrafu Pausanias, los xuegos olímpicos foron creaos por Heracles Ideo, unu de los Dáctilos. Esti propunxo a los sos hermanos una carrera na que'l vencedor sería premiáu con una corona de acebuche y afitó que los xuegos se celebraren cada 5 años, yá que esi yera'l númberu d'hermanos que formaben los Dáctilos. Otres tradiciones dicíen que foron fundaos por Zeus tres la so victoria sobre Crono, o pol otru Heracles, el fíu d'Alcmena.
Piénsase que la celebración regular empecipió nel 776 e.C., na que venció Corebo d'Élide na única prueba, que yera la carrera del estadiu. Estos xuegos desenvolviéronse sol reináu d'Ífito d'Élide, a quien se consideraba fundador o renovador de les olimpiaes. Esta fecha básase nuna llista de vencedores de los xuegos arrexuntada a finales del sieglu V e. C. por Hipias d'Élide y dende entós les feches de les olimpiaes empléguense pa definir la cronoloxía de la hestoria de l'Antigua Grecia. Dellos autores, sicasí, cunten que la fecha de restablecimientu de los xuegos por Ífito asocedió muncho primero, en 884 e. C., por cuenta de un pasaxe d'Eusebio de Cesarea qu'indica que nun se caltuvieron los nomes de los ganadores de les 27 primeres ediciones de los xuegos.
La so denominación débese al llugar de la so celebración: Olimpia, l'allugamientu del santuariu más importante del dios Zeus y asitiada nel valle del Alfeo. Celebrábense cada cuatro años ente los meses de xunetu y agostu.
El valor de los Xuegos antiguos foi múltiple: representó una manifestación relixosa d'acatamientu a los dioses; contribuyó al desenvolvimientu harmónicu del cuerpu y de l'alma; favoreció l'amistá de los pueblos y ciudaes.
Nes ciudaes, entamábenlos y dirixíenlos los maxistraos que representaben nellos al estáu. La vida pública quedaba paralizada mientres les fiestes yá que se suspendía toa actividá oficial. Mientres elles solamente resolvíense los asuntos d'estrema urxencia. Exercíen una gran influencia nes rellaciones de los estaos, allegábense a los xuegos dende los sitios más remotos y establecíense tregües de calter sagráu. Los xuegos públicos yeren una ocasión d'acercamientu ente los Estaos Griegos. Constituyíen l'alma de les rellaciones interheléniques, cuidao qu'equivalíen a verdaderes asemblees xenerales del pueblu griegu. Progresivamente amás de les polis de la Grecia continental, aumentó la participación de les múltiples colonies griegues tremaes poles mariñes del Mediterraneu. Olimpia convirtióse nuna poderosa fuerza, qu'apiguró, cola idea d'un panhelenismu creciente, a tolos emigrantes griegos esvalixaos pel mundu helénicu. La participación oficial de les ciudaes griegues nes ufriendes y sacrificios y la collaboración de los particulares creaba una sensación d'hermandá y surdía'l sentimientu de la pertenencia a una estructura sociu-política cimera a la de la polis. Paralelamente l'espíritu de competencia, monopolizáu tradicionalmente pola nobleza, estendióse al restu de la sociedá, qu'ensin abandonar entá los sos raigaños relixosos, infundieron carauterístiques más democrátiques.
Unu de los aspeutos más destacaos de los xuegos yera la tregua sagrada, que'l so orixe remótase hasta'l reináu d'Ífito, que fixo inscribir nun discu que se caltenía nel templu d'Hera los términos de la tregua. Esta tregua suponía la prohibición de toa actividá bélica mientres un periodu de duración desconocida pero del que se sabe que s'estendía dende un tiempu enantes hasta a la temporada del desenvolvimientu de los xuegos. Primeramente la tregua incluyó namái llugares allugaos nel Peloponeso pero darréu amplióse a toles ciudaes que deseyaren participar nos xuegos. Si una ciudá nun aceptaba sometese a esta norma quedaba escluyida de la participación nos Xuegos Olímpicos y si, aceutándola, violaba la tregua, tenía d'encarar importantes multes y los sos representantes yeren espulsaos.
Una de les carauterístiques más íntimes de los antiguos griegos yera'l so espíritu agonísticu. La voz griega agón equivalente de la llatina certame, aplicase a toa llucha qu'enfrenta a dos adversarios. Nos Xuegos Olímpicos había distintes competiciones:
De los agones atléticos, les carreres yeren les úniques que podíen tener vencedores por sigo soles, sicasí'l saltu de llonxitú y los llanzamientos de discu y xabalina figuraben namái como trés de les pruebes qu'integraben el pentatlón.
Los certámenes hípicos celebrábense nel Hipódromu d'Olimpia, una cortil de la que nun se caltienen restos arqueolóxicos por cuenta de la aición del ríu Alfeo.
Según Aristóteles los mozos más bellos yeren los participantes nel pentatlón, yá que taben igualmente dotaos pa la fuerza y la velocidá. Taba compuestu por cinco actividaes: saltu de llonxitú, carrera, llanzamientu de discu, xabalina y llucha. Incorporáronse a los xuegos olímpicos nel añu 708 e.C.
N'Olimpia tamién tuvieron llugar una serie de concursos artísticos. Dende l'añu 396 e.C. había concursos d'heraldos y de trompeteros. Más tarde, en dómina de Nerón, amestáronse competiciones musicales, de cantores y d'actores.
|
Nos primeros Xuegos Olímpicos facíase una fiesta llocal nel santuariu d'Olimpia n'honor a Zeus. Al instaurase la tregua sagrada les fiestes fixéronse más complexes y riquieron d'una mayor alministración. Asina la direición téunica de los xuegos y l'alministración económica pasó a manes de la Boulé d'Olimpia, tamién llamáu Conseyu Olímpicu. Esta taba encargada d'escoyer a los xueces y podía castigalos si teníen un mal desempeñu anque nun podía camudar les sos decisiones. La Boulé remanaba tamién los gastos y los ingresos de l'ayalga de Zeus.
Los helanódiques yeren los xueces de los xuegos olímpicos, tomaben el so cargu con 10 meses d'antelación, permanecíen nel so cargu por una olimpiada anque podíen ser reelixíos. Les sos xeres yeren escoyer a los meyores participantes, supervisar los entrenamientos, inspeicionar les instalaciones, dirixíen les distintes pruebes y condecoraben a los ganadores.
Yeren altos sacerdotes que supervisaben los templos, calteníen los altares y entamaben los ritos. La so función yera específicamente llitúrxica.
Créese qu'esistíen una serie de normes que regulaben los Xuegos Olímpicos na Antigüedá, pero les sanciones que s'aplicaben pola violación d'estes normes yeren aparentemente arbitraries y nun se conoz nengún casu en que se llegara a sancionar a dalgún atleta con prisión.
Nun podía matase al adversariu na llucha a esceición que fora una de les pruebes como la del pancracio, nin emburrialo nes carreres. Cuntábase que Cleómades d'Astipalea matara al so contrincante na prueba del puxilato y alloriara cuando los helanódiques quitáron-y por ello de la victoria. Conócense tamién casos de sobornos que foron sancionaos con fuertes multes.
Los que queríen participar teníen de ser homes griegos y de condición llibre, teníen que faer l'entrenamientu reglamentariu na ciudá d'Elis y emprestar el xuramentu ritual.
Nes olimpiaes más antigües los participantes usaben un taparrabos hasta que, nel sieglu V e.C., pasaron a competir desnudos. Tamién s'untaben d'aceite pa competir.
Con al respective de la presencia de muyeres, les casaes o viudes teníen prohibío l'asistencia a los xuegos. Pausanias indica que les doncelles sí podíen asistir, anque dellos historiadores consideren qu'esa afirmación ye errónea. Como casu particular, la sacerdotesa de Deméter Camime ocupaba un llugar preferente. Per otra parte, rexístrense victories de muyeres nes carreres de carros de los xuegos pero esto ye por cuenta de que nesa prueba premiábase al propietariu, non al participante.
Un añu enantes del empiezu de les competiciones, los atletes qu'aspiraben a participar nelles teníen d'entrenase nes sos propies polis, un mes enantes de les pruebes n'Elis (ciudá asitiada a 50 quilómetros d'Olimpia). La condición de griegu yera indispensable pa poder participar, requisitu que terminó cola conquista romana.
Supónse que la duración de los Xuegos yera de cinco díes y que los distintos concursos aportaron a 23, ensin incluyir ente ellos los musicales o culturales.
Tampoco hai certidume del orde nel que se desenvolvíen los concursos pero partiendo de les hipótesis más lóxiques ye posible recomponer un programa averáu de les diverses ceremonies y pruebes atlétiques.
Nes víspores de los Xuegos Olímpicos, xueces, atletes y entrenadores abandonaben Elis y dirixíense a Olimpia ante l'altar de Zeus, los atletes, padres, hermanos faíen un xuramentu que nun diben delinquir en nada escontra los Xuegos Olímpicos. Los atletes tamién faíen un xuramentu manifestando que mientres 10 meses socesivos siguieren puramente les normes del entrenamientu.
El festival olímpicu empezaba con sacrificios rituales n'honor de Zeus y de Pélope. A otru día empezaben los eventos competitivos. El primer día realizábense competiciones pa neños: carrera, puxilatu y llucha. El segundu día taba destináu a les carreres d'adultos (estadiu, diaulo y dólico) y tamién a la llucha, el puxilatu y el pancracio. Estes pruebes siguíen mientres el tercer día y, pela tarde, desenvolvíase la carrera con armes. El cuartu día empezaba cola prueba del pentatlón y pela tarde desenvolvíense actividaes ecuestres nel hipódromu. Nel quintu día teníen llugar les carreres de carros tiraos por caballos, que yeren l'espectáculu olímpicu más emocionante. Yera la xornada aristocrática por escelencia por cuenta de que tratábase de la prueba más costosa. Como'l vencedor yera'l dueñu de la cuadriga o'l caballu ganador, podía selo una muyer. El sestu día yera'l zarru de los xuegos, facíase una procesión d'aición de gracies, una llacuada pa los vencedores y l'entrega de premios.
Los ganadores de les diverses pruebes yeren aclamaos pol públicu, que-yos refundiaba flores y fueyes fresques y recibíen un premiu que consistía nuna corona d'olivar selvaxe. Tamién esistía'l vezu de cinxir una cinta de llana na cabeza del vencedor. Amás, en dómines posteriores otorgábase tamién al vencedor una fueya de palma.
La ceremonia d'entrega de premios facíase na entrada del templu de Zeus. Los heraldos proclamaben el nome, el llugar de nacencia, el llinaxe y la prueba de cada unu de los vencedores. Estos presentábense cola cinta cinxida a la cabeza y la caña de palma na mano derecha y l'helanódica más antiguu coronábalos cola caña d'olivar.
Tamién se dexaba que los vencedores pudieren dedicar una estatua cola so imaxe como conmemoración de la so victoria. Per otra parte, los nomes de los vencedores tamién figuraben nun rexistru oficial. Al tornar a les sos polis los ganadores yeren recibíos como héroes; poetes y oradores narraben les sos fazañes y en delles ciudaes recibíen pagos monetarios.
A midida que pasó'l tiempu los Macedonios participaron tamién nos xuegos olímpicos. Filipu II ganó en carreres de caballu, cuadrigues y bigas nel añu 356 e.C. Tres la espansión d'Alexandru Magnu en Persia, espublizóse la cultura griega. Los reinos helenísticos ficieron xuegos asemeyaos a los griegos en delles ciudaes. Los nuevos concursos inspiráronse nos d'Olimpia. Pero les idees relixoses que dieron orixe a los xuegos perdieron fuerza y entamábense n'honor d'un soberanu.
Tres la conquista romana de Grecia, estos tamién participaron de los xuegos pero los espectáculos multitudinarios qu'entamaben nun podíen ser más ayenos al ideal encarnáu nes competiciones griegues, que'l so significáu nunca aportó a entendíu polos romanos.
A mediaos del sieglu III empieza una decadencia progresiva. El postreru ganador de los Xuegos Olímpicos conocíu foi Varazdat, un príncipe d'Armenia, nel 385. Tres l'adopción del cristianismu como relixón oficial del imperiu col Edictu de Tesalónica (28 de febreru 380), l'emperador Teodosiu I prohibiólos nel añu 392 por consideralos de paganos, con gran influencia na so decisión de San Ambrosiu de Milán.
En 395-396 d. C. les hordes godes invadieron y saquiaron Olimpia y nel 408, Teodosiu II y Honoriu emperadores de los imperios romanos d'occidente y oriente, decretaron la destrucción de los templos y llugares dedicaos a dioses paganos.