Адзін з найбуйнейшых прадстаўнікоў у сямействе гагаравых. Маса цела 3,6-4,6 кг, даўжыня цела 68-91 см, размах крылаў 127—147 см. У дарослай птушкі ў шлюбным уборы галава, горла, шыя, махавыя і стырновыя пёры чорныя, галава і шыя з сіне-зялёным металічным бляскам; на мяжы горла і валяка вузкая чорна-белая паласа; на баках шыі чорна-белыя плямы; спіна, плечы і покрыўныя пёры крылаў чорныя з белымі плямкамі і плямамі; ніз белы; верхняя частка бакоў тулава чорная з белымі плямкамі; падхвосце чорнае; дзюба чорная; ногі цёмна-бурыя; радужная абалонка вока чырванавата-бурая; у пазашлюбным уборы верх шаравата-буры, на спіне і плячах светлая паласатасць; на ніжняй частцы шыі разарваны спераду цёмны «аброжак»; ніз белы; дзюба шэрая. Маладая птушка падобная на дарослую ў пазашлюбным апярэнні, але пёры спіны і плячэй са светлай аблямоўкай; радужная абалонка вока цёмна-карычневая.
