Testimòṅ ad Géuva

C'l artìcul chè 'l è scrit in Miranduléś Emiliàn

Batéś ad soquànt testimòṅ ad Géuva
Dū testimòṅ ad Géuva i faṅ un predicòs a cà dna dóna


I Testimòṅ ad Géuva i èṅ un muimènt religióś nâ in dal 1870 in Pennsylvania p'r òpra 'd Charles Taze Russell ch'l éra 'n studènt dla Bìbia ch'al vliva far turnàr al cristianéśum dna vòlta, qvél dal I sécul. Stand a 'n rapòrt dal 2016 i mémb'r ad cla religiòṅ chè i pàsan gl'òt migliòṅ in tut al mónd. Fra 'd lōr i s ciàman “fradèi”.

Al muimènt al créd ch'la fiṅ dal mónd la sia drē a davśinàr-as e 'l pruibìs al trasfuśiòṅ ad sangṿ e anc magnàr dal ròbi cun dal sangṿ ad bèsti dèntar. Anc al Nadâł 'l è pruibî, parchè batśâ cuma na fèsta di pagàṅ, inólt'r a n s pōl minga festegiàr gnanc i cumpleàn. Par lōr Geśù Crist al n è mia mòrt in cróś ma su 'n àlbar o atàc a 'n pâł. Da 'l 1973 a n è minga parmés a i sò mémb'r ad fumàr. I crédan sōl in Dio, ciamâ Géuva, e minga in dal Spìrit Sant ch'l è sōl la sò fòrsa. Par lōr Gesù al n è mia Dio ma 'l Arcàngil Michēl in parsòna. I Testimòṅ ad Géuva i n vótan briśa ma i s adàtan a qvél ch'i sarnìsan chi àtar.

Dascurénd ad sès, par lōr al s pōl far sōl da spusâ e 'l è pruibî far i còran o gl'invertî. Anc 'l abòrt al n è mia parmés.

I Testimòṅ ad Géuva i s riunìs'n insém tut al stmani faghénd di adunànsi in du i dascóran dla bìbia cum l'inténdan lōr, tulénd spunt da 'n artìcul dla sò rivìsta, La Tór ad Guàrdia. 'N àtar sò giurnàl famóś 'l è “Daśdâ'v!”. Cuma servìsi vuluntàri, a la manéra i cristiàṅ dna vòlta, i vàn'n a cà dla gint a purtàr „la bòna nóva dal Régn“ sunànd a i campanèi e lasànd di vulantèṅ e pruànd a tiràr da la sò banda qvéi ch'i gh vèran. Dal vòlti, invéci 'd busàr a i us, i telèfunan diretamènt o i màndan dal létri.

Testimòṅ ad Géuva famóś in dal mónd i èṅ al tenìsti Venus e Serena Williams e i cantànt Sammy Barbot e Prince.

Àtar prugèt

Culegamènt estéran