Tekst üüb Fering |
Det Moskau Gratfürstendoom (üüb Rüs: Вели́кое кня́жество Моско́вское Velíkoje Knjážestvo Moskóvskoje) wiar en rüs fürstendoom, wat faan det 13. juarhunert tu det 16. juarhunert uun a nuurdwaast faan Rüslun wooret. Det wiar tu iarst en fürstendoom (tu 1325 en dialfürstendoom faan Wladimir-Susdal), do faan 1328 en gratfürstendoom. Det wurd 1547 oner Iwan IV. det Rüs Keiserrik. A fürsten faan Moskau wiar faan det Rurik-Dynastii, wat dön rüs lunen sant at juar 862 regiaret, üüs at steed Nowgorod amtelk grünlaanjen wurd.
De iarst fürst wiar Daniil I., fürst Aleksander Newski faan Nowgorod, Wladimir-Susdal an Kiew san jongst dring. At meecht faan't gratfürstendoom wuks: 1485 wurd det Nowgorod Republiik an 1485 at Twer Gratfürstendoom dialen faan Moskau.
De gratst fürst wiar Iwan III. (of Iwan de Grat), di a tiitel keiser (üüb Rüs: царь tsaar) naam an Sofia Palaiologina freid. Sofia wiar de letst keiser faan det Uaströömsk Rik, Konstantin XI. Palaiologos sin nichte. Iwan III. saad, dat Moskau a efterfuliger faan det Uaströömsk Rik wiar (det "Traad Room"). Iwan IV. of Iwan de Skrekelk, san enkel, skeeb 1547 det Rüs Keiserrik.