Aikidō (japaansch 合気道 oder 合氣道) is en japaansche Kunst vun dat Kämpen, de vun Morihei Uyeshiba in dat vergahn Johrhunnert grünnt wörrt un kummt vun dat Daito-ryu Aiki Jujutsu (大東流合氣柔術), en Kampkunst ahn Wapen vun de Samurai. De Naam sett sik tosammen ut den dree japaanschen Wörr 合 ai „Harmonie“, 氣 ki „Energie vun dat Leven“ un 道 do „Weg vun dat Leven“.
Een öövt de Techniken mit de Afsicht, dat egene Bewegen beter to maken bit dat se ganz vun sülvst aflopen, wenn een angrepen warrt. In dat Aikidō geiht dat dorüm sik wehren to könen, wenn dor een kummt un wat Böses will. Dat geiht nich dorüm, annern Schaden to doon. Dorüm schall bi en Aikidōtechnik keeneen to Schaden kamen, nich de, de sick wehrt, un ok nich de, de angriept.
Dat de Techniken to’n Afwehren dor sünd, bedüüdt, dat in den Aikidōtechniken keen Angriepen öövt warrn deit, man dat bedüüdt nich, dat dat dor gor keen Treed und Slääg bi gifft. So wat heet denn Atemi (japaansch 当て身 oder 当身) un is dorför dor, de Angrieper, de Uke ({IPA|ɯkɛ} 受け) ut de Waag brocht warrt un nich so oppasst, wat Nage, de Verdediger (投げ) mit em maakt.
Vun de Bewegen is das Mehrste in Form vun Krinken un Spiralen un dat warrt mit de Kraft ut dat Angriepen arbeitet un nich veel egene Kraft anwennt. Dat geiht veel dorüm, dat Denken un Doon un dat Luft halen in Gliekklang to bringen. Een deit de Bewegen öven, bit dat ok de Denkwies vun dat Aikidō op een övergeiht.
Vunwegen dat mehr en „Wehrkunst“ as en Kampkunst is, sünd de mehrsten Techniken ahn en Wapen, bloot de Uke hett mannigmal en Pook, de Tantō (短刀). Nu hebbt aver vele de Menen, dat een Aikidō nich verstahn kann, ahn de Wapen to kennen, un so gifft dat uk Aikiken (合気剣 mit en Sweert un Aikijō (合気杖) mit en langen Holtstock.
Dat gifft intwüschen vele verschedene Oorten vun Aikidō, vunwegen dat vele verschedene Schölers vun Uyeshiba geev un de dat, wat se bi em lehrt hebbt, alle in ehr egen Wies wiederföhrt hebbt.
Bi dat Öven driggt een en Antog ut en een Jack, de Gi 着, en Büx un en Gördel, de witt oder bi de Meesters swatt is. En Meester ({{lang|ja|先生|sensei) driggt dor in velen Scholen noch en düüsterblauen oder swatten Hakama 袴 tu. Normalerwies is een bi dat Öven in dat¯en Sporthall, de Dōjō (道場) heet. Dor gifft dat en paar Regeln för dat Bedregen. Dor hört to'n Bispeel to, dat een sik vörenanner verbögen deit.