अकादमी सिरपा (Academy Awards) | |
---|---|
87th Academy Awards | |
लःल्हाइगु कारण | संकिपा सिद्धितेगु ख्यलय् उत्कृष्टता (Excellence in cinematic achievements) |
देय् | संयुक्त राज्य अमेरिका |
लःल्हाइपिं | Academy of Motion Picture Arts and Sciences |
दकलय् न्हापा लःल्हाःगु तिथि | मे १६, सन् १९२९ |
आधिकारिक जाःथाय् | oscars.org |
अकादमी सिरपा (The Academy Awards) वा अस्कर्स (The Oscars) (आधिकारिक नां सन् २०१३स द अकादमी अवार्दसं द अस्कर्सय् पूनर्स्थापित याःगु)[१] संकिपा ख्यलय् भिंगु ज्या याइपिं संकिपामितेत हनिगु छगू वार्षिक अमेरिकन सिरपा समारोह ख। थ्व सिरपाय् थीथी ख्यलय् भिंगु ज्या याइपिन्त छगू प्रतिमा देछाइगु या। थ्व प्रतिमायात आधिकारिक कथं अकादमी अवार्द अफ मेरित (Academy Award of Merit) धाइगु याःसां थुकिया ल्वकंह्वागु नां अस्कर ख। थ्व सिरपाया पलिस्था सन् १९२९स हलिवुद रुजवेल्त होतेलस जूगु ख। थ्व सिरपाया व्यवस्थापन अकादमी अफ मोसन पिक्चर आर्तस् एन्द साइन्सेस् (Academy of Motion Picture Arts and Sciences) वा AMPAS धाःगु संस्थां याइ।[२][३]
थ्व सिरपा देछाना समारोह दकलय् न्ह्यः सन् १९५३स तेलेभिजनं क्यनिगु यात। आः वयाः थ्व देछाना समारोह हलिंया २०० स्वया अप्व देसय् प्रत्यक्ष प्रशारण जुइगु जुयावःगु दु। [४] अस्कर्स मनोरञ्जनया ख्यलय् बीगु हलिंया दकलय् पुलांगु सिरपा समारोह नं ख। थ्व हे सिरपाया समान तेलेभिजनय् एमि सिरपा (Emmy Awards), दबूख्यलय् तोनि सिरपा (Tony Awards), व संगीत ख्यलय् ग्रामी सिरपा (Grammy Awards) बीगु या।[५] अकादमी सिरपायात हलिंया दकलय् नांजाःगु व प्रतिष्ठित संकिपा सिरपा समारोहय् छगूया रुपय् कायेगु या।[६]