La segonda batalha de Karkòv se debanèt dins lo corrent de la Segonda Guèrra Mondiala dau 12 au 28 de mai de 1942. Opausèt lei fòrças sovieticas dau Frònt Sud-Oèst e dau Frònt Sud dirigits per lo marescau Semyon Timoshenko a divèrsei formacions dau Grop Centre de l'armada alemanda (principalament la 6a Armada). Après sei succès ivernencs, l'Estat Major esperava infligir una desfacha importanta ai fòrças alemandas e organizèt una ofensiva dins la region de Karkòv. Pasmens, maugrat d'avançadas inicialas importantas, l'operacion s'acabèt per un desastre.
D'efèct, leis Alemands èran tanben a preparar d'ofensivas dins la region e i transferir una partida de son aviacion. Sei còntra-ofensivas partidas dau nòrd e dau sud li permetèron d'enceuclar leis unitats sovieticas que menavan l'ataca dins una pichona pòcha onte foguèron durament bombardadas. Lei temptativas dei soudats blocats per sortir mau capitèron e l'Armada Roja perdiguèt finalament 270 000 òmes, mai de 2 000 canons, 1 250 carris e 542 aeronaus (còntra solament 20 000 òmes per leis Alemands). Aquò laissèt ansin la màger part dau sud dau frònt sensa fòrça importanta de blindats e favorizèt d'un biais important l'avançada alemanda en direccion d'Stalingrad.