О́скар, англ. Oscar официално Academy Awards — каждорочна филмова награда, фундована Академиев филмовых умѣнь США, англ. Academy of Motion Picture Arts and Sciences, AMPAS, поважована за найпрестижнѣйшу во свѣтѣ награду во филмовом умѣню.
Створена в року 1928 на инициативу едного зоз фундаторох AMPAS и филмового штудия Metro-Goldwyn-Мауеr (MGM) в Голливудѣ продуцента Л. Б. Майера. Первый раз вручена 16. мая 1929. Назва Оскар, звязана з назвов статуеткы, символизуючой награду, появила ся од року 1939, хоть сама статуетка была створена и презентована скулптором Джорджом Стенли уже в року 1929 и вручана од зачатку.
Спочатку были 12 категорий награды, але уже в року 1930 — лем 7. Правила, процедуры и категории часто ся мѣняли. В року 1945 помѣняла ся тыж и высота статуеткы, правда, лем через высшый постамент. Теперь статуетка мать вышку 34,3 цм, а вага 3,8 кг, зроблена е з бронзу и позолочена. Од року 2012 суть номинации в 24 категориях. Номинантох вызначають за них голосують лем члены Академии, котры суть числом понад 6000 особ.
Окрем меджинародного вызнаня и престижа, награда Оскар може грати рѣшаючу роль в успѣху ей основных добывцьох. Напримѣр, награда за лѣпшый филм може значно звышити касовый успѣх филма. Актерам и режисерам награда часто приносить звекшѣня платнѣ, рост интереса масмедий и лѣпшы понукы филмох.