Приам
Приа́м, лат. Priamus, дгр. Πρίαμος — найменшый сын Лаомедонта и Стримо, шестый за рядом и послѣдный краль Трои.
- Имя
- Оригиналне имя Приама было Подарк («быстроногый»). Его отець, Лаомедонт, обѣцяв Гераклови, котрый спас Трою, оддати свою дѣвку Гесиону, але окламав го. За то Геракл забив Лаомедонта и его сынох, а Гесионѣ дозволив едного з братох при собѣ лишити. Она выбрала младшого, Подарка и выкупила го. Геракл пристав на то, же Гесионин младшый брат зостане кральовати в Трои, але одтеперь под именом Приам («выкупленый»).
- Приам во войнѣ
- В Илиадѣ, в часѣ Троянской войны, Приам уже престарѣлый краль, голова многочисленой фамилии зоз 50 сынох и 12 дѣвок, меджи котрыма найпознатѣйшыма зостали Гектор, Парис и Кассандра. Сам Приам через свою старобу не войовав, але як патриарх, як годен быв, усиловав ся свою велику родину охранити. Двараз навщѣвив грецкый табор: первый раз просив, жебы ся война вырѣшила двобойом Менелая и Париса; другый раз, жебы выпросив за цѣну великого одкупного тѣло забитого свого старшого и найодважнѣйшого сына, Гектора. Сцена, де знищеный горьом Приам просить Ахила оддати му за великый одкуп тѣло Гектора, належить меджи найпознатѣйшы и доимаючы епизоды Илиады (XXIV 169-676).
- Смерть Приама
- В Илиадѣ о смерти Приама нич ся не пише. В ту ночь, коли была добыта Троя, Приам пробовав ся вызброити и выйти на бой, але его жена, Гекуба, переговорила го и порадила вымольовати спасѣня перед домашным олтарьом Зевса. Ту го пристиг и забив з немилосерднов жестокостьов Неоптолем, сын Ахила. Смерть Приама описали Еврипид в Троянках, Вергилий в Енеидѣ, а тыж стала ся взрушуючов темов про вельо иншых умѣлцьох.
Жерела и одказы
- Козовик І. Я., Пономарів О. Д. (укл.): Словник античної міфології. — К.: Наукова думка, 1985. — 236 с. ISBN 5-12-001101-2 укр.
- Ярхо В. И.: Приам // Токарев С.А. (гл. ред.): Мифы народов мира. Энциклопедия (электронное издание) — М.: Советская Энциклопедия, 2008. — 1147 с.русс.
