Dialäkt: Mìlhüüserdiitsch |
Dr Luc Marie Daniel Ravel (info) (* 21. Mai 1957 z’ Pàriis) ìsch a frànzeescher reemisch-kàthoolischer Ordagaischtliger. Vu 2009 bis 2017 ìsch’r Frànzeescher Militäärbischoof gsìì, un sitter Hornung 2017 ìsch’r Arzbischoof vu Schtroossburi.
Dr Luc Ravel ìsch ànna 1957 ìn dr frànzeescha Hàuiptschtàdt Pàris uff d’ Walt kumma. Ar ìsch s’ drìtta vu da sewana Kìnder vum Generàl Roger Ravel un vu dr Juliette Fabre. Ar hàt dräi Schwäschter un dräi Briader ghàà. Siina Müatter schtàmmt üss Callas ìm Département Var ìn Süüdfrànkrììch. Sii Vàtter schtàmmt vu Fort-de-France ìn dr Martinique un vu Le Tampon ìn La Réunion.
Sii Militäärdianscht hàt dr Ravel ìm 1. Fàllschìrmjagerregimant bii Pau ìn Süüdfrànkriich gmàcht. Ar hàt drnooh àn dr Polytäcknischa Schüal gschtudiart, un hàt a Ìngenieur-Àbschluss àn dr Nàzionàla Hoochschüal vum Ardeel un vu da Motoora bschtànda. Drnooh hàt’r Filosoofii un kàthoolischa Gotteslehr àn dr Petrüsàbtai z’ Champagne ìm Département Ardèche gschtudiart, so wia àn dr Üniwärsiteet vu Poitiers.
Àm 7. Dezamber 1985 hàt dr Ravel sii eewiga Profass bii da Auguschtiiner-Choorhärra vum Hailiga Victor gmocht. Daa Oorda gheert zum Bund vu da Auguschtiiner-Choorhärra. Àm 25. Jüüni 1988 ìsch dr Ravel àls Priaschter gwäijt worra. Drnooh ìsch’r Probscht gsìì z’ Pruntrut ìm Schwiizer Kànton Jura, un schpeeter z’ Montbron ìm Département Charente ìm Wäschta vu Frànkrììch. Drnooh ìsch’r ìn d’ Àbtai vu Champagne iitratta, wu-n-’r vu 1996 bis 2007 Maischter vu da Noviiza gsìì-n-ìsch. Doo ìsch’r àui àb 2003 Unterprobscht gsìì. Ar hàt d’ Beweegung Notre-Dame de l'Écoute („Unsra Liawa Fràui àm Loosa“) grìnda, wo ìn da ainsààma un allaischtehenda Litt hìlft.
Àm 7. Oktoower 2009 hàt’ne dr Pàpscht Benedikt XVI. àls Militäärbischoof vu Frànkriich ärnännt. D’ Bischoofswäih hàt dr Ravel àm 29. Nowamber 2009 ìm Liawafràuimìnschter vu Pàris vum Kàrdinàl André Vingt-Trois ämpfànga. Doo drbii sìn d’ Mìtkonsekàtoora dr Bischoof vu Le Puy-en-Velay Henri Brincard un dr ehamààliga Militäärbischoof un Waihbischoof vu Lyon Patrick Le Gal gsìì. Àb’m 30. Nowamber 2009 ìsch dr Ravel offiziäll kàthoolischer Seelsorger vu da frànzeescha Schtraitkräfta worra.
Ìm Joohr 2011 ìsch dr Ravel Mìtglìed vu dr Leehra-n-üssschuss vu dr Frànzeescha Bischoofskumferanz worra.
Àm 9. Dezamber 2016 hàt dr Pàpscht Frànzisküs dr Luc Ravel àls dr 106. Arzbischoof vu Schtroossburi-n-ärnännt, àls Nohfolger vum Jean-Pierre Grallet, wo d’ kànonischa Àltersgranza vu 75 Joohra gtroffa ghàà hàt. Dia Ärnännung hàt dr frànzeescha Schtààtspresidànt ìn’ra Verordnung vum 16. Hornung 2017 biigschtìmmt. Dr Ravel ìsch àm 2. Àwrìl 2017 ìn dr Bischoofssìtz ìm Schtroossburjer Mìnschter iigfiahrt worra. Drwillscht ìsch’r offiziäll bis àm 10. Septamber 2017 Frànzeescher Militäärbischoof blìewa.
Wahrend dr Chrisàmmass àm 29. März 2018 hàt dr Bischoof Ravel d’ Opfer, wo vu Priaschter mìssbrüücht worra sìn, um Äntschultigung gebeeta.
Wu dr Ravel Bischoof vu Schtroossburi gsìì-n-ìsch, ìsch ìm Dezamber 2018 dr Ààschlààg ìm Chrìschtkìndelmärik vu Schtroossburi gsìì. Fìr d’ Oper eehra hàt dr Ravel àm 13. Dezamber ìm Schtroossburjer Mìnschter a interreligiöösa Chaltnàcht orgànisiart, wu-n-’r zamma mìt’m evànggelischa Pfàrrer Christian Krieger preedigt hàt.
Nohdam àss dr Frànzisküs sii „Briaf àns Volk vu Gott“ veräffentligt hàt, hàt dr Ravel àm 6. Septamber 2018 a lànga Hìrtabriaf gschrìewa, wo Mieux vaut tard („Bass’r schpeet“) haisst. Ìn dam Briaf hàt’r gschrìewa, àss d’ säxüälla Mìssbrüüch a „bschtandiga Krànkhait vu dr Kìrìch“ sìn, un àss àlla Kàthoolika „veràntwortlig“ solla sìì. Daa Briaf hàt’r gschrìewa, kurz nohdam àss ma säxüälla Mìssbrüüch ìn dr kàthoolischa Kìrìch ìm Pennsylvania uffgdäckt hàt. Ìn’ma Gschprach um dr Briaf hàt dr Ravel gsajt: „D’ Bischääf, wo s’ Schpiagelbìld vu dr Kìrìch han wälla schìtza, han a theoloogischa Fahler gmàcht.“ Dr Ravel salbscht ìsch àwwer àui fìr siina Rolla ìn’ra Àffàra vu säxüällem Mìssbrüüch kritisiart worra: noh-n-em Zittschrìft L’Obs hatt’r z’laid dr Àbt Griffond gschìtzt, wo Kìnder mìssbrüücht hàt.
Schpeeter ìm Joohr, noh dr Bonan-Àffàra, hàt dr Ravel dr Vàtter Bonan üss siim Àmt änthoowa. Drnooh hàt’r d’ Pfàrragmainschàft Près d’Oelenberg ìm Owerelsàss bsüacht, wu dr Vàtter Bonan Pfàrrer gsìì-n-ìsch.
Ìm März 2019 ìsch ìm Ravel sii äärscht Büach, Comme un cœur qui écoute („Wia-n-a Harz wo düet loosa“), üssagànga. Ìn dam Büach hàt dr Ravel um d’ Ursàcha un d’ Konsekwanza vu da säxüälla Mìssbrüüch ìn dr Kìrich gschrìewa, un hàt meegliga Leesunga vorgschlààga.
Ìm Nowamber 2020 hàt dr Ravel fìrs Arzbìschtumm Schtroossburi a „Gsätzbüach fìr d’ seelsorgerischa Beziihunga“ veräffentligt, fìr d’ säxüälla Missbraich ìn dr Kìrìch bekampfa. Drzüa hàt’r a „Ààwaisung fìr d’ Biichtvatter“ vorgschtällt, wo d’ „meegliga-n-Ààzaicha“ vu säxüällem Mìssbrüüch ärkläärt. Ar hàt àui verkìndìgt, àss d’ elsassischa Kìrìch a Pàtnerschàft mìt’m Verain France Victimes, mìt dr Schtààtsànwàlt vu dr Repüblik so wia mìt da Üniwärsiteetsschpìtààla vu Schtroossburi unterzaichna wìrd, fìr d’ Missbraich ààzaiga un d’ Opfer beglaita.
Àm 1. Janner 2021 ìsch dr Ravel Rìtter vu dr Eehralegioon worra.
Àls Bischoof hàt dr Ravel d’ Fiahrung vum Hailigtumm vu Dusabàch ìm Owerelsàss ìn dr Schtàdtverwàltung vu Ràppschwihr ìwwergaa. Dia Äntschaidung ìsch umschtrìtta gsìì.
Ìm Septamber 2021 hàt dr Bischoof Ravel d’ Hochzitta vu dr tràdizionàlìschta Priaschterbriaderschàft St. Piüs X. offiziäll ànärkànnt.
Ìm Luc Ravel sii bischääfliga Motto uff Làtiinisch ìsch Est, Est („Ja, Ja“). ’S kummt vu’ma Sàtz vum Màtthäusevànggelium (5,37 LUT).
Uff ìm Ravel siina bischääfliga Wàppa ìsch a Ocks z’ sah, wo dr hl. Lukàs, ìm Ravel sii Schutzhailiger, versìnnbìldlìgt. S’ Liliazäpterschtärn versìnnbìldlìgt d’ Nachschtaliawa un d’ Woohltätikait; ’s ärrìnert àn ìm Ravel sii religiöösa-n-Oorda, d’ Auguschtiiner-Choorhärra vum Hailiga Victor. D’ baida Oliivabàuimzwiiga sìn a Symbol vum Frìeda; sa ärìnnern àn d’ Iisätzung vun ìm Ravel siinera Fàmìlia ìm Frànzeescha Militäär.
Ìm Hornung 2015, ain Monet noh-n-em Ààschlààg uff Charlie Hebdo, hàt dr Ravel àls Militäärbischoof vu Frànkriich a Laitàrtìckel unterzaichent, wu-n-’r gschrìewa hàt: „Ainersitts sìn d’ ààgmaldeta un ärkännta Fììnda: d’ Bùmbaterrorischta, d’ Racher vum Profeet. Àndersitts, d’ nìt ààgmaldeta àwwer güat bekànnta Fììnda: d’ Gdànkaterrorischta, Äntschaidungtraager vu dr Laiziteet, Ààbeeter vu dr Repüblik.“ Wagadam hàt d’ Zittschrìft vum Militäärbìschtumm nìmm s’ Logo vum frànzeescha Militäär därfa benutza. Ìm Àwrìl 2017, wu-n-’r ìm Bischoofssìtz vu Schtroossburi-n-iigfiahrt worra-n-ìsch, hàt’r a „ìwweriischtìmmenda Laiziteet“ bfìwortet un hàt gsajt, àss’r s’ Konkordàt ìm Elsàss-Mosel unterschtìtzt. Ìm Àwrìl 2021 hàt’r behàuipta, àss dr Konkordàt kää Verschtooss gega d’ Laiziteet ìsch.
Ìm Hornung 2015 hàt dr Luc Ravel siina Opposizioon züa dr fräiwìlliga Schwàngerschàftsàbbruch üssgedruckt: „D’ islàmischa Ideologii hàt ìn Frànkrììch 17 Opfer gmocht. Àwwer d’ Ideologii vum Komformischmus màcht jeeds Joohr 200.000 Opfer ìm Müatterliib. Dr fräiwìlliga Schwàngerschàftsàbbruch, wänn’r a Grundracht wìrd, ìsch a Màssavernìchtungswàffa.“ Ìm Jüüli 2017, ìn’ma Gschprach mìt dr Zittung Dernières Nouvelles d’Alsace, hàt dr Ravel gsajt, àss „dr fräiwìlliga Schwàngerschàftsàbbruch nìt numma züagschtànda wìrd, àwwer wìrd bfeerdert.“ Wänn’r ìm saalwa Gschprach ìwwer dr Geburtssàtz ìn Frànkriich grädd hàt, hàt’r d’ Theorii vum „Groossa-n-Üsstöisch“ ärwäähnt. Ànna 2018 hàt’r àwwer gsajt, àss d’ wäschtliga Gsällschàfta d’ Migrànta solla ìntegriara.
Dr Ravel hàt d’ säxüälla Missbraich ìn dr Kìrìch àls a „metaschtàsiarta Krabs“ bezaichent, un hàt a Zammahàng gmocht zwìscha dr „Unfruchtbàrkait vu dr Kìrìch“ un da Missbraich. Ìm März 2019 hàt’r ìm Pàpscht Frànzisküs siina Äntschiadung kritisiart, dr Rucktrìtt vum Kàrdinàl Barbarin nìt ààz’namma: ar hàt gsajt, àss d’ kàthoolischa Gaischtliger „jeena Glàuibwìrdigkait verloora“ han.
Ìm Septamber 2019 hàt dr Ravel ìn da elsassischa Kàthoolika-n-ämpfoohla, sìch gega d’ kìnschtliga Befruchtung fìr d’ lesbischa Pààra z’ engaschiara.
Nohdam àss d’ frànzeescha Regiarung wahrend dr COVID-19-Waltversöischung d’ religiöösa Versàmmlunga um 30 Persoona bgranzt hàt, hàt dr Ravel gsajt: „d’ gegawartiga Laiziteet ìsch kää Zwaigschprach-Laiziteet, àwwer a Laiziteet, wo duurasätzt wìrd (...). A Laiziteet, wo nìt d’ Religioonsfraihait hoch bewartigt, ìsch a gfoohrliga Laiziteet.“ Wahrend dr zwaita-n-Üssgàngschpärra ìm Nowamber 2020 hàt’r zamma mìt kàthoolischa Fàmìlia-n-orgànisàzioona a Iischpruch biim Schtààtsroot ghàlta, fìr d’ Granza vu 30 Persoona biim Gottesdianscht àbschàffa. Ìm gliicha Monet hàt’r d’ „àdminischtràtiiva Hàltlosikait“ vum Schtààt kritisiart.