As die Rooti Liste vo de gfäärdete Arte oder nume die „Rooti Liste“, im Original Red Data Book, het mä ursprünglig de Liste gsäit, wo din die gfäärdete Dierarte uf dr ganze Wält ufgfüert si und wo sit 1966 vo dr Wältnaturschutzunion International Union for Conservation of Nature and Natural Resources (IUCN) in unregelmäässige Abständ veröffentligt wärde. Im Lauf vo dr Zit het mä denn au Rooti Liste vo gfäärdete Pflanze afo uusegee, und gege s Ändi vom 20. Joorhundert si zum erste Mol au Rooti Liste vo Bilz oder Biotoptüpe erschiine.
Hüte isch d IUCN die äinzigi Organisazioon, wo en umfassendi Rooti Liste füert as Dokumentazioon vo alle Arte uf dr Wält, wo gfäärdet si. Sit de 1970er Joor wärde vo dr IUCN und vo andere internazionale Organisazioone, vo Staate, vo Gliidstaate wie de dütsche Bundesländer oder vo Naturschutzverbänd Rooti Liste veröffentligt, wo geografisch iischränggt si.
Hüte git s au Rooti Liste vo äinzelne taxonomische Gruppe wie die vom IUCN über die gfäärdete Gansvöögel, Chatze oder Hundartige uf dr Wält. In Länder, wo d Erfassig vo bedroote Arte wit forwärtschoo isch, wärde mäistens sonigi begränzti Rooti Liste ufgstellt, wie zum Bischbil die Roote Liste vo de Bruetvöögel vo Dütschland oder vo de Groossbilz vo dr Schwiz.
Rooti Liste gälte as wüsseschaftligi Fachguetachte, und diene de Gsetzgääber und Behörde as Grundlaag für was si im Bezug uf dr Natur- und dr Umwältschutz sötte mache. Nume in e baar Staate, wie in dr Schwiz, si si rächtswirksam.