Norman Foster, Barón Foster de Thames Bank, Orde de Méritu del Reinu Xuníu (1 de xunu de 1935, Stockport) ye un arquiteutu británicu. Premiu Príncipe d'Asturies de les Artes 2010.
Estudió arquiteutura na Universidá de Mánchester y algamó depués una beca pa proseguir los sos estudios na Universidá de Yale. De regresu n'Inglaterra, Foster trabayó un tiempu col arquiteutu Richard Buckminster Fuller y fundó en 1965 l'estudiu d'arquiteutos Team 4, xunto cola so primera muyerWendy, Richard Rogers y la muyer d'ésti, Sue. Dos años más sero'l nome del estudiu foi camudáu y quedó en Foster and Partners.
Los proyeutos iniciales de Foster caracterícense por un estilu "High-tech" mui pronunciáu. Más sero les llinies de los sos edificios suavícense y desapaez en buena parte esi carácter téunicu lleváu al estremu. En tou casu, los proyeutos de Foster y los sos socios lleven un marcáu sellu industrial, nel sentíu de qu'empleen nos edificios elementos que se repiten multitú de veces, polo que son fabricaos en llugares alloñaos de la obra. Frecuentemente diséñense componentes pa un edificiu ex profeso, espeyando con ello un estilu de buena manufactura.