Steven Paul Jobs (24 de febreru de 1955, San Francisco – 5 d'ochobre de 2011, Palo Alto), conocíu como Steve Jobs foi un afamáu empresariu ya informáticu d'Estaos Xuníos, presidente d'Apple Inc. y una de les más importantes figures de la industria informática y del entretenimientu.
Xunto al co-fundaor d'Apple, Steve Wozniak, Jobs aidó a la popularización del ordenador personal no cabero de los años 70. A entamos de los años 80, entá n'Apple, Jobs foi de los primeros n'albidrar el potencial comercial de los sistemes d'Interfaz Gráficu d'Usuariu (GUI).
Dempués de tener problemes cola cúpula directiva de la empresa qu'él mesmu fundó, Jobs foi despedíu d'Apple Computer en 1985, fundando postreramente la compañía NeXT, la que foi reabsorbida pola propia Apple Computer en 1997, onde Jobs foi presidente hasta poco enantes de fallecer.
Fíu d'una xoven soltera universitaria, que decidió entregalu n'adopción, cuando entá yera un nácaru, a una pareya d'universitarios. La pareya nagüaben por una neña, polo que nel últimu intre nun aceutaren. La madre d'Steve diólu entós a una pareya de clas trabayadora, Clara y Paul Jobs, trabayador esti últimu na compañía estatal de tresporte ferroviariu. Medró en Mountain View y Los Altos, California.
A los 17 años entra na universidá Reed College en Portland, Oregon, a la qu'asiste namái 6 meses enantes de desdexala per aciu de lo costoso de los estudios, que los sos pás nun podíen pagar. Pese a que desdexa los estudios, sigue asistiendo como oyente a les clases que-y prestaben, como por exemplu caligrafía. Los sos estudios en caligrafía foren-y de munchu valir cuando diseñó la tipografía del primer Mac.
A los 20 años, entama Apple nel garaxe de los sos pás xunto al so collaciu Steve Wozniak. En namái 10 años algama convertir a Apple nuna empresa de 4.000 emplegaos.
Irónicamente, a los 30 años despídenlu d'Apple –la empresa qu'él mesmu crió– pero'l so espíritu emprendedor llevárenlu a criar una nueva empresa nomada NeXT y otra empresa nomada Pixar, que fadríen historia postreramente.
Taba casáu con Laurene Powell en 1991, a la que conoz nuna clas de Stanford University y formen una familia. Dambos son vexetarianos. A Jobs diagnosticaren-y cáncer de páncreas, malura que supera parcialmente tres un curtiu y caru procesu nuna renomada clínica oncolóxica californiana, teniéndo-y que ser tresplantáu un fégadu. Finalmente muerre del cáncer que sufría dende 2004.