Manifesto communista |
---|
instantia de: obra scripte |
subclasse de: manifesto |
|
Commons: Communist Manifesto |
Le Manifesto communista (Das Kommunistische Manifest), originalmente titulate Manifesto del partito communista (in lingua german Manifest der Kommunistischen Partei), es un curte publication ab 1848 componite per le theoristas politic Karl Marx e Friedrich Engels. Illo era recognoscite como un del maxime influential manuscriptos del mundo. Commissionate per le Liga communista, illo establi le scopos e programma del Liga. Illo presenta un approche analytic al bello del classes (historic e presente) e le problemas del capitalismo, in vice de un prediction del formas potential del communismo.
Le libro contine theorias per Marx Engels re le natura de societate e politica, que secundo lor proprie parolas: "Le historia del tote adhuc existente societates es le historia del guerra del classes". Illo etiam brevemente tracta lor ideas re como le societate capitalista del epocha eventualmente sera reimplaciate per socialismo, e postea eventualmente communismo.
Friedrich Engels era subinde creditate in componer le prime minutas que duceva al Manifesto communista. In julio 1847, Engels era eligite in le Liga communista, ubi ille era assignate schizzar catechismo. Isto deveniva le Minuta de un confession communista de fide. Le minuta contineva quasi duo dozenas de questiones que exprimeva le ideas de ambe Engels e Karl Marx in iste tempore. In octobre 1847, Engels componeva su secunde minuta pro le Liga communista titulate Le principios de communismo. Le texto remaneva non publicate usque 1914, in despecto de su base pro Le Manifesto. Ab le minutas per Engels, Marx era capace scriber, semel commissionate per le Liga communista, Le Manifesto communista, ubi ille combinava plus ab su ideas ensemble con le minutas e opera per Engels, Le condition del classe laborante in Anglaterra.
Quanquam ambe nomines de Engels e Karl Marx appare super le pagina titulo al latere del "persistente assumption de co-autorato", Engels, in le prefacio del introduction al edition german de 1883 del Manifesto, assereva que le Manifesto era "essentialmente le opera per Marx" e que "le pensata de base... pertine solo e exclusivemente a Marx."
Engels scribeva post le morte de Marx,
Io non pote negar que, e ante e dum mi collaboration de quaranta annos con Marx, io habeva un certe portion independente in establir le fundationes del theoria, sed le maxime grande parte de su major principios de base pertine ad Marx... Marx era genio; nos alteres al plus talentate. Sin ille le theoria non serea tanto disveloppate como illo es nunc. Illo tunc con ration porta su nomine.
In despecto del modestia de Engels in iste duo citationes, in facto ille faceva major contributiones al Manifesto, incipente con le suggestion derelinquer «le forma de un catechismo e titular lo le Manifesto communista». Preterea, Engels jungeva Marx in Brussel pro le composition del Manifesto. Il non ha prova de qual contributiones sue al final scripto era, ma le Manifesto porta le marca del stylo plus rhetoric de Marx. Tamen, il sembla clar que le contributiones de Engels justifica le apparition de su nomine super le pagina titulo apud iste de Marx.
Le Manifesto communista era primo publicate in lingua german in London per un gruppo de refugiatos politic german in 1848. Illo era etiam episodiate circum le mesme tempore in un jornal londonian in lingua german, le Deutsche Londoner Zeitung. Le prime traduction in lingua anglese era producite per Helen Macfarlane in 1850, e le libro era primo publicate in le Statos unite de America per Stephen Pearl Andrews. Le Manifesto passava tra multe editiones ab 1872 usque 1890; notabile nove prefacios era scribite per Marx e Engels pro le edition german de 1872, le edition russe de 1882, le edition francese de 1883 e le edition anglese de 1888. Le edition de 1910, traducite per Samuel Moore con le auxilio de Engels, es le maxim communmente usate texto anglese depost tunc.
Tamen, alicun recente editiones anglese, como iste del annotate "road map" (carta de itinere) per Phil Gasper (Haymarket Books, 2006), usava un texto tenuemente modificate in responsa al criticas contra le traduction per Moore enunciate per Hal Draper in su historia del Manifesto publicate in 1994, The Adventures of the "Communist Manifesto"(Le aventuras del Manifesto communista), (Center for Socialist History, 1994).
In le fin del anno 2010, Red Quill Books annunciava le publication de un moderne, illustrate version "comic book" (banda designate) Archived 2014-02-22 at the Wayback Machine del Manifesto communista in quatro partes.
Le Manifesto es dividite per un introduction, tres substantial sectiones, e un conclusion.
Le preambulo al texto principal del Manifesto assere que le continente de Europa time le «spectro del communismo» e que le poteres del vetere Europa uni se in un «sancte alliantia exorcisar iste spectro». Marx hic refere non solo al domos de poter e aristocratias terren - le burgesia - sed etiam ad diverse factiones como le papato e le emergente mundo corporative. Marx declara que «Il es grande tempore que le communistas debe coram, al facie del integre mundo, publicar lor vistas, lor scopos, lor tendentias e concurrer iste conto infantin del spectro del communismo per manifesto del partito ipse».
Le prime capitulo del Manifesto, «Burgeses e proletarios», examina le conception marxista del historia, con le idea initial asserente que «Le historia de omne adhuc existente societate es le historia del bello del classes.» Illo continua dicente que in capitalismo, le classe operose, proletariato, contende in le bello del classes contra le dominos del instrumentos de production, le burgesia, e que iste passate bello del classes claudeva sia per revolution lequal restructurava societate, sia per «commun ruina del contendente classes»".
Illo continua adjungente que le burgesia exploita le proletariato per le «constante revolutionisamento de production ininterrumpite turbation de omne conditiones social.»
Le Manifesto explica que le ration pro lequal le burgesia existe e exploita le proletariato per su basse salarios es le proprietate private, «le accumulation de opulentia in manos private, le formation e accrescimento de capital», e que competition inter le proletariato crea bello de labor, lequal es appoiate integremente super le competition inter le laboratores.
Iste section explica in plus que le proletarios eventualmente elevara se al poter tra bello del classes: le burgesia constantemente exploita le proletariato pro su labor manual e vil salarios, ultimemente pro crear profito pro le burgeses; le proletariato eleva se al poter tra revolution contra le burgesia como tumultos o creation de uniones. Le Manifesto communista affirma que dum il ha adhuc bello de classes in le societate, capitalismo sera subvertite per proletariato solo pro itero inciper in le proxime futuro; ultimemente communismo es le clave pro equalitate del classes inter le cives de Europa.
Le secunde section, «Proletarios e communistas», incipe asserente que le relation de conscie communistas con le ceterum del classe operose, declarante que illi non formara un partito separate lequal oppone altere partitos del classe operose, exprimera le interesses e general voluntate del proletariato qua ensemble, e distinguera se ab altere partitos del classe operose per semper exprimente le commun interesse del integre proletariato independentemente de omne nationalitates e representante le interesses del movimento qua collectivo.
Le section continua defendente communismo ab varie objectiones, como le pretension que communistas favorea «amor libere», e le pretension que homines non volera operar in un societate communista nam ili non habera incentivo pro laborar. Le section claude delineante exigentias a termino curte:
Le implementation de iste politicas serea, secundo Marx e Engels, precursor del societate sin classe e sin stato (apatride). In un controversial passage illi suggere que le "proletariato" poterea in competition con le burgesia esser obligate organisar se qua classe, formar un revolution, facer se un classe dirigente, scopar le vetere conditiones de production, e in iste scalon haber abolite su proprie suprematia qua classe. Iste conto del transition ab socialismo ad communismo era criticate particularmente dum e post le era sovietic.
Le tertie section, «Litteratura socialista e communista», distingue communismo ab altere doctrinas socialista prevalente in iste tempore dum lequal le Manifesto era componite. Dum le grado de reproche de Marx e Engels verso perspectivas rival varia, omnes son dimittite pro favorar reformismo e fiascar in recognoscer le rolo preeminente del classe operose.
The concludente section, «Position del communistas in relation con le varie partitos de opposition», brevemente discute le position communista re bellos in paises specific in le dece-none seculo como Francia, Suissia, Polonia e Germania, e declara que Germania es «in le die ante un revolution burgese», e predice que un revolution mundial tosto sequera. Illo tunc claude declarante un alliantia con le socio-democratas, harditemente supportante altere revolutiones communista, e vocante le proletarios al action, finiente per le crito de rejunction del communismo: «Laboratores del mundo, uni vos!".
Le unda revolutionari tra Europa in 1848, lequales incipeva in Francia in februario e mox diffundeva se in le majoritate de Europa e partes de America latin, debeva nihil al Manifesto communista, sed intra un anno le revolutiones collabeva. Posteriormente, autoritates traditional trovava in le Manifesto communista e su contento bon excusa pro ager contra su scriptores. Consequentemente, Marx e su uxor era arrestate e expellite ab Belgia, le jornal quotidian german publicate per Marx in Colonia inter 1 junio 1848 e 19 maio 1849, Neue Rheinische Zeitung: Organ der Demokratie, era supprimite, e Marx ipse era expellite ab Germania e Francia, e, in augusto 1849 ille refugiava se in London.
Un certe numero de scriptores del 21me seculo commentava re le continue pertinentia del Manifesto communista'. Le docto John Raines, scribente in 2002, notava que "In nostre die, iste Revolution capitalista attingeva le maxime remote angulos del terra. Le instrumento del pecunia produceva le miraculo del nove mercato global e le omnipresente centro de compras. Lege le Manifesto communista, scribite ante plus que cento-cinquanta annos, e vos discoperira que Marx prevideva lo integremente." Scribente in 2003, le marxista anglese Chris Harman describeva le obra, affirmante:
Il ha ancora un qualitate compulsive in su prosa como illo provide perspicacia post perspicacia intra le societate in lequal nos vive, ubi illo era e ubi illo va. Illo es itero capace explicar, dum economistas e sociologos del pensata majoritari non lo pote, le hodierne mundo de today's world of recurrente bellos e repetite crises economic, de fame pro centos de milliones in un mano e "superproduction" in le altere. Il ha passages lequales haberea potite exhaurite ab le maxim recente scripturas re globalisation.
Le continue pertinentia del theorias marxista trovate intra le texto era etiam supportate per le docto marxista Alex Callinicos, editor del jornal International Socialism (Socialismo international), lequal assereva que "Isto es quidem manifesto pro le 21me seculo."
Scribente in The London Evening Standard le 23 april, Andrew Neather citava le re-edition del Manifesto communista per Verso Books de 2012, con introduction per Eric Hobsbawm, como parte de resurgentia de ideas levorso lequales include le publication del optime venditor Chavs per Owen Jones: The Demonization of the Working Class, e le documentario per Jason Barker: Marx Reloaded.
In junio 2013, le manuscripto del Manifesto communista insimul con Das Kapital, Volumine I es registrate in Memory of the World Programme.
Le revisionista marxista e reformista socialista Eduard Bernstein distingueva inter prime marxismo qua su forma «immatur»: como lo attesta le Manifesto communista componite per Marx e Engels in lor juventute, quem ille opponeva a lo quem ille considerava como su violente blanquista tendentias; e plus tarde marxismo qua su forma «matur» quem ille susteneva. Iste «matur» forma de marxismo refere ad Marx in su vita ulterior recognoscente que socialismo poterea esser attingite per medios pacific tra reforma legislative in societates democratic.
Bernstein declarava que le massive homogenee classe operose revindicate in le Manifesto communista non existeva, e que contrarimente ad pretensiones de un majoritate proletari que emergerea, le classe medie cresceva sub capitalismo e non dispareva como Marx lo prescribeva. Bernstein notava que le classe operose non era homogenee sed heterogenee, con divisiones e factiones intra illo, includente syndicatos socialista e non-socialista. Marx ipse ulteriormente in su vita recognosceva que le classe medie non dispareva, in su obra Theorias del plusvalor (1863). Tamen, a causa del popularitate del Manifesto communista e le obscuritate del Theorias del plusvalor, le recognition de Marx re iste error non es ben cognite.
George Boyer describeva le Manifesto qua "permulto un film de epocha, very much a period piece, un documentari de lo quem on nominava le 'famelic' annos 1840."