Triple Entente
Le Triple Entente (del francese entente que significa amicitate, comprension, accordo) indica le intendimento diplomatic informal inter le Imperio russe, le tertie Republica francese, e le Regno Unite de Grande Britannia e Irlanda. On lo construeva sur le base de altere accordos diplomatic preexistente, como le Alliantia francorusse de 1894, le Entente Cordial de 1904 inter Paris e London, e le Convention anglorusse de 1907. Le Triple Entente creava, al vigilia del Prime Guerra Mundial, un forte contrapeso al Triple Alliantia de 1882 inter le Imperio german, le Imperio austrohungare, e le Regno de Italia, ma in omne caso non constitueva un ver alliantia de mutue defensa.