|
Jalisco esas stato di Mexikia, jacanta weste de la lando, an la rivo di Pacifiko.
Bazala fakti pri Jalisco.
Nomada populi arivis en la regiono di Jalisco cirkume 15 mil yari ante nun. La maxim anciena evidentaji pri homala habitado en la regiono trovesis proxim lagi Zacoalco e Chapala.
Jalisco jacas weste de Mexikia, kun litoro che Pacifiko. Havanta entote 78 595,9 km² di surfaco totala, ol esas la 7ma maxim vasta stato Mexikiana, e lua tota surfaco reprezentas 4,09% de la lando. Lua tereni esas diversa, inkluzanta foresti, plaji, planaji e lagi. L'altitudi varias de 0 metri (apud litoro) til 4300 metri super marala nivelo (monto Nevado de Colima). La stato kontenas omna 5 ekosistemi Mexikiana: arida e miarida regioni, foresti tropikala pluviala, foresti tropikala sika, naturala pasturaji, e boski de temperema regioni, kun querki e pini.
Fluviala baseno Lerma/Santiago esas la precipua dil stato. Ol konsistas ek rivero Lerma, longa de 750 kilometri, qua debushas an lago Chapala, ek fluvio Santiago, qua naskas en lago Chapala e debushas an Pacifiko, e lua diversa enfluanti. Altra fluvii fluas direte weste vers Pacifiko, kontre ke altri fluas sude.