Panumpes ing Srebrenica | |
---|---|
Péranganing Perang Bosni | |
Pernah | Srebrenica, Bosnia lan Hércegovina |
Tanggal | 11–22 Juli 1995 |
Inceran | Wong Bosnia (lanang & nom-noman lanang) |
Jinising serangan | Peneluking militèr, rajapati gedhèn-gedhèn, panumpesing ètnis |
Pepati | 8.373 |
Sing nindakaké | Wadyabala Républik Srpska Wadyabala militèr Škorpioni |
Panumpes ing Srebrenica utawa rajapati gedhèn-gedhèn ing Srebrenica (Bosni: Masakr u Srebrenici; Genocid u Srebrenici) iku panumpes kang kalakon rikala Juli 1995. Panumpes iki matèni wong Muslim cacah 8.000 punjul, kang akèh-akèhé wong lanang lan nom-noman saka ètnis Bosni ana ing wewengkon Srebrenica, Bosni. Kang nindakaké panumpes iki prajurit Sèrbi Bosni awit saka pakoné Jéndral Ratko Mladić. Rikala 26 Mèi 2011, Jéndral Mladic kapikut ing Lazarevo, ing Sèrbi iring lor. Rikala 27 Fèbruwari 2007, Mahkamah Internasional (MI) mutusaké yèn lelakon iki minangka laku panumpes. Ana ing panumpes iki wadyabala Sèrbi aran Škorpioni uga kadakwa salah.
Ana ing putusaning MI kaandharaké yèn Sèrbi ora salah mungguh ing laku panumpes iki. Mangkonoa, MI meksa ngecam Sèrbi amarga ora bisa nyegah, ngendhalèni, utawa ngadili wong-wong kang nindakaké panumpes mau. Miturut Komisi Internasiyonal tumrap Wong Ilang ing Bosni, gunggungé kurban kang kalapuraké nganti saiki wis ngancik wong 8.373. Tutug Juli 2012, kurban tumpesan cacah 6.838 wis kasil katitik awit saka analisis DNA tumrap pérangan-péranganing awak kang dijupuk saka pakuburan gedhèn-gedhèn. Rikala Juli 2013, kurban cacah 6.066 kinubur ana ing Pakuburan Potočari. Panumpes ing Srebrenica ingaran panumpes gedhé dhéwé ana ing Éropah ing mangsa sabubaré Perang Donya II. Lelakon iku uga dadi lelakon pisanan kang kinukuhan minangka panumpes lumantar dalan ukum.