De kleiner sjtaej ónger aanveuring van Leide, Haarlem en Gouda blokkere in de Sjtate van Hollandj 't amnestieveursjtèl veur Hugo de Groot. Hae verleët opnuuj 't landj.
Hendrik Casimir volg zien vader op es sjtadhawwer van Frieslandj, Groninge en Drenthe óndanks poginge van Frederik Hendrik óm sjtadhawwer van alle Zeve de geweste te waere.
Frederik Hendrik perbeert de kathelieke graaf Hendrik van den Bergh aan te zètte de adel in 't zuje in opsjtand te brènge taenge wat ein manifesto van de Sjtate-Generaal van de Repebliek der Zeve Verenigde Nederlanje 't zjwaor en óndraaglik juk van de Sjpanjaarde neump. Brussel is heël erg bezörg.
Vanoet Luuk reup van den Bergh aopelik op tot opsjtand, mer de óntevraeje adel in 't zuje is toch neet bereid óm mèt 't kettesje noorde in zeë te gaon. Ziej sjtèlle hunne houp meë op kardinaal Richelieu.
De Infanta sjtuurt vanoet BrusselRubens nao Mesjtreech óm ein besjtand veur te sjtèlle aan Frederik Hendrik. Dae haet dao mer wènnig belangsjtèlling veur.
De zudelikke Sjtate-Generaal kómme - veur de lètste keër ónger Sjpaans gezag - biejein. Ziej dwinge de Infanta - taenge de wil van Filips IV - mèt 't noorde te óngerhanjele. Sjpanje mót noe eësj zien gezag in 't zuje zeen te hersjtèlle.
De Sjtate van Zeëlandj besjlete de resjtante van Reimerswaal -noe ein boewvallig dörpke- te verkoupe. Oats de derde sjtad van Zeëlandj is de plaatsj noe ein ónbewoond eilandje dat oetèntelik in de golve ten ónger zal gaon.