Guyana atau sacaro rasmi Republik Koperasi Guyana adolah sabuah nagara di daratan utara Amerika Selatan. Wilayah nan dikuasoi Guyana talatak di antaro garih lintang 1° dan 9°LU, jo garih bujua 56° dan 62°B. Jo lawehnyo 215.000 km2 (83.000 sq mi), Guyana adolah nagara badaulaik katigo taketek di daratan Amerika Selatan sasudah Uruguay jo Suriname. Jo garih pantai Atlantik sapanjang 459 km (285 mil) di timur lauik, Guyana dibatehi oleh Venezuela di barat, Brasil di barat jo selatan sarato Suriname di timur.
Politik Guyana tajadi dalam karangko republik demokrasi perwakilan parlementer, dima Presiden adolah kapalo nagara jo kapalo pamarentahan, jo sistem multipartai. Kuaso eksekutif dijalankan dek Presiden jo Pamarentah. Kuaso legislatif dipacik dek Presiden jo Majelis Nasional Guyana. Sacaro historis, politik marupokan sumber katagangan di nagara ko, jo karusuhan ba kakarehan acok tajadi salamo pamilu. Salamo tahun 1970-an jo 1980-an, lanskap politik didominasi dek Kongres Nasional Rakyat.
Pado tahun 2022, panduduak Guyana dipakirokan bajumlah 795.408 urang. Mayoritas utamo (sakitar 90%) panduduak Guyana tingga di sapanjang garih pantai sampik nan bakisa dari leba 16 sampai 64 km (10 hingga 40 mil) ka padalaman jo hanyo mancakuik sakitar 10% dari total laweh daratan nagara.