Dit Woort hett noch annere Bedüden: kiek dorför ünner Gotha (Mehrdüdig Begreep).
Gotha is de fieftgröttste Stadt van den Freestaat Döringen un Kreisstadt van den Landkreis Gotha. Se hett 45.589 Inwahner (Stand: 31. Dezember 2017) up en Flach van 69,58 m².
Gotha wurr eerstmals in en an’n 25. Oktober 775 in Düren utstellt Oorkunn nömmt. Mit hör hett Karl de Groote dat Kloster Hersfeld ünner annern den Teihnten van de Ländereen, Wald un Wiesen van de Villa Gothaha (= goot Water) övereegnet. De Betrecken to Hersfeld söllt woll ok de Grund ween hemm för de Övernahm vun den Stadthilligen St. Gothardus, en ehmalgen Abt van Hersfeld un lateren Bischop van Hilmessen. Man nimmt aber an, dat dat dor vörher ok all en Siedlung geven hett, dat Rebeet dor weer all siet lang Tieden besiedelt.
Gotha weer van 1640 bit 1825 Residenzstadt van dat Hartogdom Sachsen-Gotha-Altenburg und af 1826 Hööft- un Residenzstadt van dat Hartogdom Sachsen-Coburg un Gotha. 1820 wurr in de Stadt mit de Gothaer Versekerung dat düütsch Versekerungswesen begrünnd. In‘n Gothaer Tivoli hett sück 1875 de Sozialistische Arbeiterpartei Deutschlands (SAP), de sück later in SPD umnömmt hett, grünnd. De Stadt weer en Zentrum van dat düütsch Verlagswesen, so wurrn in den Verlag Justus Perthes, grünnd 1785, vörr allen kartographische Publikatschonen (Landkorten, Atlanten, Wandkorten u. a.) erstellt.
Dat Wohrteeken van Gotha is de gröttste fröhbarocke Feudalbau in Düütschland, dat Slott Friedenstein mit den öldsten Engelschen Gorden up den europääschen Kontinent un den to begahn Kasematten.