Filmdaten | |
---|---|
Plattdüütsch Titel: | — |
Originaltitel: | Harry Potter and the Goblet of Fire |
Düütsch Titel: | Harry Potter und der Feuerkelch |
Produkschoonsland: | USA Grootbritannien |
Johr vun’t Rutkamen: | 2005 |
Läng: | 151 Minuten |
Originalspraak: | Engelsch |
Öllersfreegaav in Düütschland: | FSK 12 |
Filmkru | |
Speelbaas: | Mike Newell |
Dreihbook: | Steve Kloves Joanne K. Rowling |
Produkschoon: | David Heyman |
Musik: | Patrick Doyle |
Kamera: | Roger Pratt |
Snitt: | Mick Audsley |
Dorstellers | |
|
Harry Potter and the Goblet of Fire (op Platt so veel as „Harry Potter un de Füerbeker“; dt. Titel: Harry Potter und der Feuerkelch) is de Verfilmen vun den glieknöömten Roman vun de britsche Schrieversche Joanne K. Rowling, de in dat Johr 2005 ünner den Speelbaas Mike Newell dreiht worrn is un an’n 6. November 2005 in London ooropföhrt worrn is. Weltwiet hett de Film ruchweg 890 Miollionen US-Dollar inspeelt un höört dormit to de spoodrieksten Filmen. Alleen in Düütschland geev dat üm un bi acht Millionen Tokiekers in de Kinos.
De veerte Deel vun de Harry Potter-Reeg fangt mit de Weltmeesterschap in’n Quidditch an. De dree jungen Töverers Harry, Hermine un Ron warrt vun Rons Vadder Weasley dorto inlaadt, tosamen mit noch mehr Weasleys un Frünnen. Man, as de Meesterschap so in Gang is, warrt dat Feld mit de Telten un Ünnerkünften vun düstere Gestalten angrepen, de sik as Liddmaten vun de Doodeters – Anhangers vun Lord Voldemort – rutstellt un de Gesselligkeit op’n Slag tonichten maakt.
Torüch in de Tövererschool Hogwarts geiht dat ok üm en Wettstriet, as Hogwarts in dit Johr Utrichter vun dat Trimagische Turneer wesen schall. In dissen Sinn reist Delegatschonen vun twee wietere Tövererscholen an, de sik ünnerenanner meten schüllt. Dat een is de Deernsschool ünner dat Regeer vun Madame Maxime, wiel de annere School ünner Igor Karkaroff teemlich martialisch optreden deit. Elk schall een Schöler bestimmen, de jemehr School vertreden deit. De Utwahl, wokeen dat för jede School wesen schall, maakt de so nöömte Füerkelch. Man, as de Kandidaten bestimmt warrn schüllt, speet de Kelch op eenmol veer Naams ut, dorünner uk den vun Harry, de gor nich weet, wat em passeert. He seggt, dat he sik gor nich to Wahl stellt harr, man Ron glöövt em dat nich un vermoodt, dat he sik wichtig doon will.
De Wettstriet wiest sik as gefährlich, man na un na mööt de Deelnehmers jemehr Opgaven angahn. Blangento leggt de Film aver ok en Sworpunkt op de twüschenminschlichen Geföhlen, mit de junge Lüüd so to schapen hebbt, wenn se langsom öller warrt. Se gifft dat en Wiehnachtsball, bi den se dansen mööt. As so vele Jungen lüüd, fallt Harry un Ron dat nich licht, en Deern to fragen, wat se mit jem op’n Ball gahn wüllt. Un de Fründschap twüschen Hermine, Ron un Harry warrt dorbi böös op de Proov stellt. Man, se finnt wedder tosamen, as de Gefahr wassen deit.
An’n Enn vun den Wettstriet geiht aver wat nich sien rechten Gang. In en groot Labyrinth kamt Cedric un Harry, de beieden Deelnehmers vun Hogwarts gemeensom an’n Pokal an, man op mol finnt sik de beiden ganz woanners wedder, as de Doodeters neemlich Harry vör en Ritual bruken doot un se dat Turneer as Tarnen bruukt hebbt. Cedric kummt bi dat Openeendrapen üm, un Lord Voldemort kriggt dör dat Ritual en – noch nich vullkamen – minschlich Gestalt torüch. Alleen dör de Help vun sien Öllern, de in’n Geist bi em sünd, kann he an’n Enn överleven un sik redden.
Liekers, dat de Film an eenige Steden – sünners de Beleevnissen ründ üm de Quidditch-Weltmeesterschap – bannig kört worrn is, is en verständlichen Film dorut woorn. As de Speelbaas seggen dee, weer dat nich andacht, ut den Film en Kinner- oder Märkenfilm to maken, man dat schüll en Thriller warrn, de blangento dat Geföhlsdilemma twüschen Ron un Harry un twüschen de Jungs un de Deerns in’t Vörfeld to’n Wiehnachtsball düütlich maken schall. Liekers sünd aver ok en poor ne’e Szenen toföögt worrn, as to’n Bispeel de Danskurs as Vörbereiten op den Ball.
De Film is för tosamen 38 Filmpriesen nomineert worrn, dorünner ok för Oscar in de Kategorie: Best Szenenbild. Uttekent worrn is he mit negen Priesen:
2001: Harry Potter and the Sorcerer’s Stone | 2002: Harry Potter and the Chamber of Secrets | 2004: Harry Potter and the Prisoner of Azkaban | 2005: Harry Potter and the Goblet of Fire | 2007: Harry Potter and the Order of the Phoenix | 2009: Harry Potter and the Half-Blood Prince | 2010: Harry Potter and the Deathly Hallows: Part 1 | 2011: Harry Potter and the Deathly Hallows: Part 2 |