San Diego Comic-Con International, თაშნეშე ჩინებული მუჭოთ Comic-Con — საირქიანო ირწანური ფესტივალი, ნამუთ 1970 წანაშე იმანჯებუ ნოღა სან-დიეგოს (ააშ). ფესტივალი დარსხუეს შელ დორფიქ, რიჩარდ ალფიქ, კენ კრიუგერქ მაიკ ტოურიქ. დუდმაართაშე გურგოჩამილი რდჷ მუჭოთ კომიქსეფიშ, ომენცარე ფანტასტიკეფიშ / ფენტეზი კინოს / ტელევიზია დო თიწკჷმა მერსხილი პოპულარული ხელუანობაშ გჷმოფინუა. ასე პოპ-კულტურაშ შხვა ელემენტეფს ხოლო იკათუანს, თიჯგურეფი მუჭომეფით რე ტელესერიალეფი, საშჷნელებეფიშ ლიტერატუტა, მულტიპლიკაცია, ანიმე, მანგა, ოლაფინიეფი, კოლექციური კარტიშ ლაჸაფეფი, ვიდეოლაჸაფეფი, ფენტეზი დო ვებ-კომიქსი. თეჯგურა პროფილიშ უშხუაში ფესტივალი რე, ნამუთ იმანჯებუ ააშ-ს, დო მასუმა რე მოსოფელს, კომიკეტიშ (იაპონიას) დო ანგულემიშ საირქიანო კომიქსეფიშ ფესტივალიშ (საფრანგეთის) უკული. ფესტივალი იმანჯებუ ზარხულს, ოთხი დღაშ გოძვენას, ცაშხაშე ჟაშხაშა.