ომენოღალე ავიაციაშ საირქიანო ორგანიზაცია (ICAO) არსებენს 1947 წანაშ 4 პირელშე. თიში ამოცანეფი დო ღანკეფი, სტრუქტურაშ დო კომპეტენციაშ ოწესდვალო დვალირობეფი მოჩამილი რე ჩიკაგოშ 1944 წანაშ კონვენციაშ მაჟირა ნორთიშ გოთოლწორაფათ. თეწკჷმა ართო იკაო-შ ნორმეფი ნუმუთ მუთმოფხვადჷნა ჩიკაგოშ 1944 წანაშ კონვეციაშ I დო III ნორთეფს. თენა რე იკაოშ წესდვალუაშ მუშობურობა. საირქიანო ომენოღალე ავიაციაშ მალასიან გოვითარაფაქ ანუ სახენწჷფოეფიშ ომენოღალე ავიაციაქ, ნამუთ დოკაფილი რდეს საირქიანო ოჰეერე მეულა-მოულათჷნ, გაპიჯალჷ 1944 წანაშ გერგობათუთას ჩიკაგოშ კონფერენციას საირქიანო ომენოღალე ავიაციაშენი კონვენციაშ დოდვალა (1944 წანაშ ჩიკაგოშ კონვენცია) დო ომენოღალე ავიაციაშ საირქიანო ორგანიზაციაშ (იკაო) დორსხუაფა. ჩიკაგოშ 1944 წანაშ კონვენციაშ დო იკაო-შ საქვარუაშ თარი ღანკი რე საირქიანო ომენოღალე ავიაციაშ უშქურანჯი დო კვანწილი გოვითარაფილი, წორწო შელებუამობაშ ოსხირს საირქიანო ოჰეერე მეულა-მოულაშ გონიერო დო მიოჭირნეთ სრულაფა (1944 წანაშ ჩიკაგოშ კონვენციაშ პრეამბულა). იკაოშენ აკომუშებული დო მეღებული ტექნიკურ-იურიდიული მოთხირეფიშ თარი მუშობურობა რე, ნამჷ-და თინეფი რე ტექნიკურ-იურიდიული ეტალონეფი, ნამუსჷთ უღჷ მორალურ-პოლიტიკური, მარა ვაიურიდიული შანულობა. სახენწჷფო, ნამუთ უხუჯანს თე თუ თი სტანდარტის, რეკომენდაფილ პრაქტიკას ვარ-და წესეფს, ნამჷდგა ბორჯის შეულებჷ თინეფიშ ვარაფა, თუ თენა ოუციეთ მიღჩქინჷ-და, მარა იკაო ბრელი ტექნიკურ-იურიდიული მეძირაფას ირზენს საირქიანო ფურინუეფიშ უშქურანჯობაშ საჭირო დონეშ გარანტიას, სახენწჷფოეფი ოცადჷნა არძო პიჯალაშ სრულაფას.
სასო-ს უღჷ შკვითი რეგიონალური ოფისი, ნამუთ ჩხორო რეგიონს მართუენს.