Quel articul chì l'è scrivüü in Lumbard, cun l'urtugrafia insübrica ünificada. |
El Paul Auster (Newark, New Jersey, USA 1947 ) a l'è un scritur, pueta, tradütur e diretur de cinema american.
A l'è nassüü a Newark el 3 de febrar del 1947 d'una familia uriginaria de l'Europa centrala e ebraiga. El legg tant de bagaj e'l taca a scriv i so prim puesij in de l'adolescenza. 'L se laurea a la Columbia University in del 1969 e pöö 'l part cunt una petrulera. Intra 'l 1971 e'l 1974 'l viv in Francia. A l'è un periud dedigaa suratüt a la puesia (i liber Unearth del 1974 e Wall Writing del 1976).
Al se met a scriv rumanz a la fin di agn '70. El riva al sücess literari internaziunal cun la famusa Trilugia de New York, fada de trì liber cürt. Ultra a fà el scritur 'l se dediga anca al cinema 'me scenegiadur (Smoke e Blue in the face) e anca regista (Lulu on the Bridge).
A l'è spusaa cunt la so segunda miee, la scritura Siri Hustvedt, famusa anca lee, e i dü i hann una tusa, Sophie (l'aveva giamò avüü un fiö de la prima miee, la scritura Lydia Davis).
A l'è cunsideraa un scritur postmudern. Tema tipigh de la so övra a hinn l'assürd, l'esistenzialism, i stori del crimin, la recerca de l'identità e del sens. I so liber principaj a hinn The New York Trilogy (1987), Moon Palace (1989), The Music of Chance (1990), The Book of Illusions (2002) e The Brooklyn Follies (2005).